مقتطفات مع السفر 1

• 
  

  
  

  
  
  
  السفر متنفس ومتعة وإستجمام، كايخليك تنعزل عن السيفيليزاسيون لمدة معينة، كاتنسا العالم الوهمي، كايخليك تكتاشف مناطق، تكتاسب تجارب، تتعلم حكم، تشارك حكايات، وتروي قصتك لغيرك.
• 
  
• 
  
  السفر متعة للنفس و للوجدان، وطريقة لتحدي النفس؛ كايخليك تستمتع باللحظة، وتنساجم مع الجسد ديالك مع كل خطوة كاتزيدها للامام، وأنا في زاكورة، مع صديقة اللي كانفتاخر بالصداقة ديالها، مامعول على حتى حاجا، كل شيئ حدث بالصدفة، حلم، راه الحلم مافيهش الضريبة او الجمارك، قبل مانوصلو زاكورا ونحن فالكار، مع إطلالة خفيفة من الشمس، كفتاة نهار الخطبة ديالها فاش كاتطل على العريس، الجبال والواحات محيطة بنا، مسودة ولمعان دالشمس كايسطع فالافق، منظر باقي مرسوم فالذاكرة.. تخيلت كيفاش غادي تكون الاجواء فمحاميد الغزلان.. وصلنا فطرنا، جاو صحاب التوريزم لإقتناصنا لكن الحظ كان نصيبنا، كانفطرو سولنا واحد السيد خدام فواحد لاجونس بحون ذكر الاسماء، منين نتوما و..و تلاقانا ظريفين، اعطانا نصائح، وتوجيهات؛ وصيفتنا عند عائلته واصدقائه، وعرفنا بلي الخير باقي موجود فالإنسان.. بسبابو طلعات الحملة الإنتخابية 5/5.
• 
  مشينا للمحاميد باش ندوزو الليلة الاولى ف تاراكالت، باش نوصلو لديك المنطقة، حتاجينا لما يقارب ساعتين بالجمل باش نوصلو للمنطقة المعنية وسط اللا مكان داخل رمال ذهبية وكثبان رملية خيالية.. وصلنا قبل الغروب بما يقارب ساعة، وجد لينا المرشد السياحي كاسكروت، تحط الكاسكروت فوق الرملة على مائدة صغيرة، مع براد د اتاي صحراوي، لوهلة تخيلنا ريوسنا ملوك وعشنا اللحظة بدون هموم او..او..
• غروب الشمس كان رائع والشروق أكثر من رائع، حين تطل الشمس عليك وانت وسط الصحراء الشرقية وعلى بعد 14 كيلوميتغ من الجزائر او ما يقاربها..
• رمال ذهبية ممزوجة بشمس براقة تلمع في الافق .. ( بالمناسبة اللي بغا معلومات عن المكان او..او راه ممكن نوجه ونساعدو بإرشادات )
• اليوم الأول داز اكثر من المتوقع،
• كايقولو السفر مع شخص كايخليك تتعرف عليه اكثر و أكثر، مع بعض الضجيج فالرأس لﻵنسة أنيسة لكن كان ضجيح مقبول،
• 

  النهار الثاني رجعنا للمحاميد، وإتجهنا مباشرة لقرية تامكروت، اللي بالمناسبة فيها أعرق مكتبة بالمملكة تحتوي على اكثر من 4000 كتاب الى مر العصور، قرية تتميز بالهدوء والسكينة وتواجد واحات ومعروفة بالنخل في كل مكان، وصلنا لﻷوتيل تغدينا، رتاحينا وأخذنا دوش منعش، ودزنا ديريكت نتساراو حول القرية، جاو القناصة تاني يقتانصونا لكن بسباب السيد اللي تعرفنا عليه وجهنا وصيفتنا ومشينا بكل ثقة باش نكتاشفو القرية بدون مساعدة أحد، تسركلنا، ومشينا وجاو عندنا اﻷطفال الصغار لعبنا ضحكنا بغينا نتصورو معاهوم بحال إلى لحتي قنبلة هيروشيما، كولشي هرب.. ماشي موشكيل، دوزنا وقت ممتع بدون صداع ديال طونوبيلات او ضجيج اللوزينات و..و مشينا رجعنا للأوبيرج، رتاحينا، دخلنا للخيمة اللي هي عبارة عن ريستورون صحراوي جميل، تعشينا تماك، كنا نحن و كوبل من النمسا وآخر من بريطانيا، تبادلنا أطراف الحديث، والتجارب، و..و ثم جاء صاحب الاوبيرج وجاب معاه آلة العود وأصدقائه، لعبو العود وامتعو آذاننا بالطرب الصوفي و..و كان واعر، سالينا مشينا نوجدو لليوم الموالي، فقنا الصباح الموالي، بعد دوش لطيف، مشينا نفطرو، فطرنا واردنا العودة لزاكورة، أخذنا البحث عن طاكسي جايا من بعيد تدينا، شويا هاهو الكوبل الاوتريشي جاي تاهو خارج غادين لزاكورة، الزهر كان معانا على طول، وقفو لينا وماتسنينا حتى 3 دقائق كاملة، عاودنا تبادلنا اطراف الحديث مع التعمق في الجراح و..و حتى وصلنا لزاكورا، مواح مواح باي باي هاف ا كود لايف مع دعاء مستجاب بعد تبادل المعلومات الشخصية و..و وصلنا لزاكورا اول حاجة درناها مشينا رجعنا عند السيد اللي تلاقينا معاه فالاجونس، هضرنا معاه شكرناه، مع هدية رمزية و..و ارشدنا في الحين عند اوتيل احد افراد عائلته في زاكورة و توادعنا، جلسنا إرتحنا وجبنا دورة في المدينة وإستمتعنا بالشمس اللطيفة اللتي تلامس اطراف جسدك العارية لتحول لونه من ابيض إلى بني مغلوق او أحمر.. عدنا وكان الجو رائع او واعد، اخدنا نسبح قليلا في المسبح واخذنا دوش خفيف ورتاحينا ثم اخدنا وجبة الغداء.. بعده إستمتعنا بالجو اللطيف داخل الفندق.
• وصلات الرابعة دالعشية، عرفت بلي الوداع قريب، قريب نودع الآنسة اللي دوزت معاها واحدة من اجمل الذكريات، ذكريات ستبقى راسخة في القلب ، تبدلت وليت ضريف، ربمى بسبب الفراق؟
• خرجو الدموع بوحدهوم وهربت للطواليت حاشاكوم بحجة غادي نقاد شعري باش نخرجو نجيبو آخر دورة قبل ان التحق بالحافلة اللتي ستنطلق مع 8 مساءا،
• كانشوف فراسي فالمرايا، واش منير هذا؟

• شحال هذه مابكيت على فراق شخص ما، لربما هذا ما يسمى الولف، تولف شخص
• صبرت راسي وقلت بلي القادم احلى، مسحت وجهي وإبتسمت ومشيت قلت لها اتون موا جاغيف ،معين في ظرف قصير،
• شريت بطاقة بريدية فالخارج دالفندق، كتبتها فالريسيبسيون،
• دخلت ، جمعت حوايجي مع ديك 6 دالعشية لنتناول وجبة كاسكروت مجموعين، قبل ان نغادر الغرفة ، قلت لها تسبقني، 
• خرجت الآنسة، حطيت البطاقة البريدية بالقرب من حقيبتها فخرجنا، توجهنا للقرب من المحطة
• عدنا إلى نقطة البداية، إلى المكان اللذي اخدنا فيه فطورنا الاول،
• جلسنا واحد مقابل مع الآخر، تبادلنا اطراف الحديث، تناولنا آخر براد د اتاي مجموع وحريرة،
• دقت ساعة الخطر بقيت اقل من ساعة، شجعاتني، تاقت بيا، حفزاتني للمتابعة والمثابرة لتحقيق احلامي،
• العودة ضرورية لنلتقي من جديد ،
• تمالكت نفسي وودعنا بعضنا البعض،
• مشيت نركب الكار او الحافلة، كانطلع للحافلة، طلعات قبل ماتنطالق الحافلة، نظرات حزن واخرى د دموع الفرح، آخر كلماتها، بالفرنسية اوقتبس؛ طهلا فراسك ا منير، غادي نرجع ونتلاقاو من جديد.
• لكل نهاية بداية اجمل واروع
  
  
  منير يحياني